नेपालगन्ज / केहीदिन यता नेपालगन्जमा चिसो अत्यधिक रुपले बढेको छ । चिसो हवा, हुस्सु र कुहिरोले नेपालगन्जलाई ढाकिएपछि चिसो अत्यधिक रुपले बढेको हो । चिसो बढेपछि यहाँको जनजीवन समेत कष्टकर बनेको छ । दिउँसोको समय हल्का घाम लागेपनि विहान साँझ चिसो बढ्दै जान थालेपछि कठ्यांग्रिदो चिसोमा बालबालिकाहरु विद्यालय जान बाध्य भएका छन ।
आज (बुधबार) बिहान नेपालगञ्जको न्यूनतम तापक्रम ७.८ डिग्री सेल्सियस र अधिकतम तापक्रम २१ डिग्री सेल्सियस रहेको जल तथा मौसम कार्यालय नेपालगञ्जका नायव मौसम विज्ञान सहायक कुमार रानाले जानकारी दिए । ‘यो आज बिहान ८ बजेर ४५ मिनेटमा मापन गरिएको तापक्रम हो,’ उनले भने ।
यसअघि मंगलबार नेपालगन्जको तापक्रम झनै घटेको थियो । रानाका अनुसार मंगलबार बिहान ८ बजेर ४५ मिनेटमा कायम गरिँदा नेपालगञ्जको न्यूनतम तापक्रम ६.५ डिग्री सेल्सियस र अधिकतम तापक्रम १८.५ डिग्री सेल्सियस थियो । बुधबारको तुलनामा मंगलबार झनै कम रहेको नायव मौसम विज्ञान रानाले बताए ।
