नेपालगन्ज / नेपाल प्रेस युनियन बाँकेको नवनिर्वाचित कार्यसमितिले पदभार ग्रहण गरेको छ । प्रेस युनियन बाँकेको गत साउन २७ गते भएको १२ औं जिल्ला अधिवेशनबाट निर्वाचित प्रियास्मृती ढकाल नेतृत्वकाे कार्यसमितिले बिहीबार पदभार ग्रहण गरेको हो ।
साथै कार्यसमितिलाई निर्वाचन कार्यालयले प्रमाण पत्र समेत प्रदान गरेको छ । निर्वाचन समितिका निर्वाचन आयुक्त जनक बहादुर शाहीले प्रमाण पत्र बितरण तथा पदभार ग्रहण कार्यक्रमको अवसरमा निर्वाचित पदाधिकारी एवं समितिलाई प्रमाण पत्र बितरण गर्नुभएको थियो ।
प्रेस युनियन बाँकेका वर्तमान अध्यक्ष अर्जुन ओलीको अध्यक्षतामा भएको कार्यक्रममा बाेल्दै नेपाल प्रेस युनियन लम्बिनी प्रदेशका उपाध्यक्ष जयसिंह केसीले युनियन बाँकेका वर्तमान पदाधिकारीले संस्थाकाे संचालनका लगि दुःख गरेकाे देखिएको बताउनुभयो ।
उहाँले पत्रकार महासंघको नेतृत्वका लागि पनि वर्तमन समितिले बिशेष भूमिका निर्वाह गरेको भन्दै अबको नेतृत्वले बाँकी रहेको कामलाई पुर्णता दिनुपर्ने बताउनुभयो । निर्वाचनमा जितको लागि अपनाउनुपर्ने कार्य निर्वाचनकै लागि मात्र भएको भन्दै ती कुरालाई थाँती राखेर अब युनियनलाई कसरी प्रभावकारी र पारदर्शी बनाउने भन्ने सबैको उत्तिकै दायित्व रहेको बताउनुभयो ।
अबको नेतृत्वले युनियनमा सबै साधारण सदस्यलाई मिलाएर लैजाने अपेक्षा समेत प्रदेश उपाध्यक्ष केसीले व्यक्त गर्नुभयो । यस्तै पदभार ग्रहण कार्यक्रमलाई सम्बोधन गर्दै वर्तमान अध्यक्ष ओलीले बिभिन्न चुनौतीका बाबजुद संस्थालाई व्यवस्थित बनाउने कार्य अघि बढाएको र केही कुराहरुलाई पुरा गर्न नसकिएको बताउनुभयो ।
कुनैपनि कार्य गर्दा चुनौती रहने तर अठोटका साथ अघि बढ्दा समाधान पनि हुने आफुलाई अनुभव भएको अध्यक्ष ओलीले बताउनुभयो । निर्वाचनका बेला निर्वाचन हतकण्डालाई अब बिर्सेर नेतृत्वदायी भूमिका निर्वाह गर्नुपर्ने भन्दै ओलीले संस्थाकाे दिगोपनाका लागि आफुहरुको नेतृत्वले जग्गा व्यवस्थापन गर्न सकेकोमा खुशी व्यक्त गर्नुभयो ।
यस्तै पदभार ग्रहण गर्दै नवनिर्वाचित अध्यक्ष प्रियास्मृती ढकालले युनियनलाई सबैको बनाउन कुनै कसर बाँकी नराख्ने र कोही कसैलाई युनियनबाट एक्लिएको महसुस हुन नदिने बताउनुभयो । निर्वाचनमा आन्तरिक प्रतिस्पर्धा रहेको र अब ति कुरा सकिएको भन्दै संस्थालाई आर्थिक रुपमा बलियो बनाउने कार्यको युनियनले शुरुवात गर्ने पनि अध्यक्ष ढकालले बताउनुभयो ।
युनियन बाँके शाखा अध्यक्ष ओलीले नवनिर्वाचित अध्यक्ष ढकाललाई र वर्तमान सचिव बिजय मल्लले नवनिर्वाचित सचिव भिष्म लोधलाई संस्थाको जिम्मेवारीसंगै माइन्यूट लगायतका सम्पूर्ण कुराको बुझबझारथ गर्नुभएको थियो । कार्यक्रममा प्रेस युनियन प्रदेशका उपाध्यक्ष केसी, महासचिव नविन गिरी, नेपाल पत्रकार महासंघ लुम्बिनी प्रदेशका उपाध्यक्ष शुक्रऋषि चौलागाई, कार्यसमिति सदस्य मोहम्मद आरिफ अन्सारी, प्रेस युनियन प्रदेश सदस्य गौरव गिरी, निवर्तमान कार्यसमिति र वर्तमान कार्यसमिति पदाधिकारीको उपस्थिति रहेको थियो ।
