बाँके / खजुरास्थित जेठिनालामा बेपत्ता भएका १६ वर्षीय किशोरको शब फेला परेको छ । तीन दिनको वर्षापछि खजुरा गाउँपालिका वडा नं. ७ स्थित जेठिनालामा आएको भेलमा पौडी खेल्न गएका खजुरा गाउँपालिका वडा नं. ६ शान्तिनगर स्थित श्री जनकल्याण माध्यमिक विद्यालयको कक्षा ९ मा अध्यानरत १६ वर्षीय बिकाश सुनार बुधबार पौडी खेल्ने क्रममा डुबेर बेपत्ता भएका थिए ।
सुनार बेपत्ता भएलगत्तै ईलाका प्रहरी कार्यलय धनौलीबाट खटिएका प्रहरी टोली र सशस्त्र प्रहरी टोलीको सहयोगमा शुक्रबार तीन दिनपछि मृत्यु अवस्थामा शव भेटिएको खजुरा गाउँपालिका उपाध्यक्ष मन्जु मल्लले जानकारी दिनुभयो ।
जेठिनालामा रहेको जामुनको रुखको जरामा शब अल्झिएको अवस्थामा फेला परेको प्रहरीले जनाएको छ । धनौलीका प्रमुख प्रहरी निरीक्षक सन्दिप बेलबासेको नेतृत्वमा उद्धार कार्यमा नेपाल प्रहरी, सशस्त्र प्रहरी बल, नेपाल आर्मी लगायत खटिएका थिए ।
