खजुरा / बाँकेमा अत्यधिक गर्मी बढेपछि खजुरा मातहतका विद्यालयहरुमा गर्मी बिदा दिएको छ । केही दिनयता अत्यधिक गर्मी बढ्दै गएपछि खजुरा गाउँपालिकाले सम्पूर्ण विद्यालय तीन दिनका लागि बन्द गरिने निर्णय गरेको हो ।
खजुरा गाउँपालिका शिक्षा, युवा तथा खेलकुद शाखा प्रमुख खगेन्द्र मल्लले मंगलबार एक विज्ञप्ति जारी गर्दै यही जेष्ठ १७ गतेदेखि १९ गतेसम्म सम्पूर्ण विद्यालय बन्द रहने जानकारी दिए । अत्याधिक गर्मीका कारण पठनपाठनमा कठिनाइ भएकाले बर्षे बिदाबाट कट्टी हुने गरी विद्यालयबाट माँग आएकाले उक्त माँग बमोजिम शिक्षा समितिका संयोजकले तीन दिन गर्मी विदा दिएको विज्ञप्तिमा उल्लेख छ ।
देशकै अत्यधिक गर्मी हुने ठाउँ मध्येको एक बाँके जिल्लामा पछिल्ला केही दिनदेखि चलेको तातो हवा (लु) का कारण गर्मी ह्वात्तै बढेको छ । जसले गर्दा विद्यालयमा अध्ययन अध्यापन गर्ने गराउने सम्पूर्णलाई असर परिरहेको छ ।
