नेपालगन्ज / नेपालगन्जको धम्बोझी चोकमा आज बिहीबार पुन: स्व. राजा विरेन्द्र शाहको शालिक स्थापना गर्ने प्रयास गरिएको छ । तर शालिक स्थापना गर्ने क्रममा विवाद भएपछि प्रहरीले शालिक हटाइएको छ ।
राजतन्त्रका पक्षधर युवाले नेपालगन्जको धम्बोझीस्थित वीरेन्द्र चोकमा दरबार हत्या काण्ड भएको आज जेष्ठ १९ गतेको दिन स्व. राजा वीरेन्द्र वीर बिक्रम शाहको सम्झनामा पुन: शालिक स्थापना गर्न खोजिएका हुन ।
स्व. राजा वीरेन्द्र शाहको शालिक स्थापन गर्ने क्रममा हाम्रो राजा हाम्रो देश प्राण भन्दा प्यारो छ, हाम्रो भाषा हाम्रो भेष प्राण भन्दा प्यारो छ जस्ता नाराबाजी समेत गरेका थिए ।शालिक राख्ने क्रममा नेपालगन्ज उपमहानगरपालिका केही जनप्रतिनिधिको समेत सहभागिता देखिएको छ ।
०६२/६३को जन आन्दोलनका क्रममा राजा बिरेन्द्रको शालिक तोडफोडपछि हटाइएको शालिक पुनः राख्दा प्रहरीले २४ घण्टा नबित्दै शालिक निकालिदिएको थियो । त्यस यता राजा समर्थकहरुले शालिक स्थापना गर्न पटक पटक प्रयास गरेका थिए । 
बिहीबार बिहान शालिक राख्ने प्रयासका क्रममा प्रहरी र राजतन्त्रका पक्षधर युवा बीच सामान्य झडप हुँदा दुबैपक्षकालाई समान्य चोटपटक लागेको जानकारी प्राप्त भएको छ ।
यसैबीच स्वर्गिय राजा बिरेन्द्रको शालिक राख्न नपाएको झोकमा सेतु बिकको शालिक तोडफोड प्रयास गर्न पुगेका युवाहरूलाई प्रहरीले लखेटिएको छ । सेतुको शालिकमा ढुंगा हानेर भागेपछि सडक हिड्नेलाई प्रहरीले पक्राउ गरेको स्थानीयले बताएका छन । 
अहिले धम्बोजी र सेतु बिक क्षेत्र तनाब ग्रस्त बनेको छ । यी दुबै क्षेत्रमा ठुलो संख्यामा प्रहरी परिचालन गरेको छ ।
