नेपालगन्ज । देशभरका कैदी बन्दीजस्तै आफूहरु पनि भाग्न पाउनु पर्ने भन्दै नेपालगन्ज कारागारका कैदी बन्दीहरु कारागारभित्र आगजनी गरी भाग्न खोज्दा सुरक्षाकर्मीले प्रहार गरेको गोली प्रहारबाट एक जना कैदी बन्दी घाइते भएका छन ।
घोडाघोडी – २, कैलालीका २४ वर्षीय उपेन्द्र बमको खुट्टामा गोली लागेर उनी घाइते भएका हुन । घाइते बमलाई उपचारका लागि एम्बुलेन्स मार्फत् नेपालगन्जस्थित भेरी अस्पताल पुर्याइएको छ ।
विहीबार अपरान्ह करीब ४ बजेतिर कारागारको भित्रिगेटमा भेला भएका कैदी बन्दीहरु निकै बेरसम्म नाराबाजी गर्दै आगजनी र तोडफोड गरेका थिए । सुरक्षामा खटिएको नेपाली सेनाले धेरै बेरसम्म सम्झाई बुझाई गर्दा पनि उनीहरूले उल्टै सेनामाथि आक्रमण गर्ने प्रयास गरेपछि सेनाले गोली प्रहार गरेको थियो ।
कैदीबन्दीले आगजनी गरेपछि त्यहाँ आएको दमकलले आगो नियन्त्रणमा लिएको छ । कारागारमा अहिले सेनाको नेतृत्वमा सशस्त्र प्रहरी बल र नेपाल प्रहरी गरेर धेरै ठुलो संख्यामा सुरक्षाकर्मीहरु तैनाथ छन । उनीहरुले कारागारलाई चारैतिरबाट घेरेर अवस्था नियन्त्रणमा आए पनि तनावग्रस्त रहेको सुरक्षाकर्मीहरुले जनाएका छन् ।
