मैनापोखर । बर्दियाको बढैयाताल गाउँपालिका वडा नम्बर ६ मैनापोखर स्थित हुलाकी सडक खण्डबाट लागुऔषध ब्राउन सुगरसहित दुई जना पक्राउ परेका छन् ।
गुलरियाबाट नेपालगन्ज तर्फ जाँदै गरेको भे १ ख ४२४७ नम्बरको फोर्स गाडीलाई इलाका प्रहरी कार्यालय मैनापोखर बर्दियाबाट खटिएको प्रहरी टोलीले आकस्मिक सवारी साधन चेकजाँच गर्ने क्रममा उनीहरूलाई पक्राउ गरिएको बर्दिया प्रहरीले जनाएको छ ।
पक्राउ पर्नेमा बर्दियाको मधुबन नगरपालिका वडा नम्बर ८ गाँउ नम्बर १ का २५ वर्षीय माधब चन्द र सोही ठाउँका २४ वर्षीय अर्जुन कुँवर रहेका छन् । प्रहरीले उनीहरुको साथबाट २ पुडिया प्लाष्टिक सहित २७ ग्राम ४८० मिलिग्राम र प्लाष्टिक खोली हेर्दा शुद्ध तौल २४ ग्राम १०० मिलि ग्राम (लागू औषध) ब्राउन सुगर जस्तो देखिने खैरो रङको गिलो पदार्थ बरामद गरेको जनाएको छ ।
जिल्ला प्रहरी कार्यालय बर्दियाका प्रहरी निरीक्षक कृष्ण डाँगीका अनुसार पक्राउ परेका उनीहरुलाई बर्दिया जिल्ला अदालतबाट ५ दिन म्याद लिई इलाका प्रहरी कार्यालय मैनापोखर बर्दियामा राखेर घटना सम्बन्धमा थप अनुसन्धान भईरहेको जनाएको छ ।
