नेपालगञ्ज । बाँकेको चार स्थानमा आजदेखि कार्तिक शुक्ल पूर्णिमा नहान मेला शुरु भएको छ । जानकी गाउँपालिकाको दुई स्थान जोगागाउँ र गुरुवागाँउ तथा डुडुवा गाउँपालिकाको राप्तीनदीस्थित सिधनयाघाट र राप्तीसोनारी गाउँपालिकाको टिकुलीपुर लगायत स्थानमा शुक्रबारदेखि नहान मेला शुरू भएको हो ।
प्रत्येक वर्ष पूर्णिमाको अवसरमा लाग्दै आएको पुर्णिमा नहान मेलाको जानकी गाउँपालिका वडा नम्बर २ जोगागाउँस्थित जानकी मन्दिर सगराकुट्टी क्षेत्र र बेलहरीस्थित शिव मन्दिर तथा नागा बाबाकुट्टीमा बर्षौदेखि लाग्दै आएको परमपरागत ऐतिहासिक मेलाको उद्घाटन जानकी गाउँपालिकाका अध्यक्ष छब्बन खाँले रिबन काटेर गर्नुभएको हो ।
जानकी गाउँपालिकाले मेला व्यवस्थापन एवं भण्डाराका लागि जोगागाउँ र गुरुवागाउँलाई डेढ- डेढ लाख रुपैया सहयोग स्वरुप दिएको गाउँपालिका अध्यक्ष खाँले बताउनुभयो । गाउँपालिका वडा २ का वडाअध्यक्ष चन्द्रीका प्रसाद गुप्ताले ऐतिहासिक मेलाको संरक्षणका लागि आफूहरूले आवश्यक सहयोग गर्दै आएको बताए ।
पुराना मेलाका रूपमा चिनिएका यी मेलामा बाँके, बर्दिया, दाङ, सुर्खेत लगायत विभिन्न स्थानका साथै भारतको रुपईडिहा, बाबागंज, नानपारा, श्रावस्ती, खिरी, लखिमपुर लगायतबाट मानिस आउने गर्छन । मेलामा राति सांस्कृतिक कार्यक्रम समेत हुने गर्दछ ।
मेला मूल समितिका अध्यक्ष दयाराम भुजुवाको अध्यक्षतामा भएको उद्घाटन कार्यक्रममा स्वागत मन्तव्य वडा नं. २ का वडाअध्यक्ष चन्द्रीका प्रसाद गुप्ताले राखेका थिए । भने कार्यक्रम सन्चालन मेला समितीका सदस्य शकील अहमद राईले गरेका थिए । यसैबीच पूर्णिमाका दिन राप्ती नदीमा स्नान गर्ने भक्तजनहरुको आज विहानैदेखि घुइँचो लागेको छ ।
कार्यक्रममा नेकपा एमाले बाँके क्षेत्र नं. ३ का संयोजक भिम ओली, जानकी गाउँपालिकाका उपाध्यक्ष रामप्यारी यादव, वडा नं. ३ का अध्यक्ष राज कुमार वर्मा, वडा नं. ५ का अध्यक्ष टिकानाथ यादव, सामाजिक विकास समितीका संयोजक राम अचल धोबी, वडा नं. २ का सचिव कविता रेग्मी, श्री मावि. जोगागाउँ विव्यसका अध्यक्ष रज्जब अली हल्वाई, मेला मूल समितिका पदाधिकारीहरु, नागरिक समाजका अगुवाहरु, सुरक्षा निकायका प्रमुखहरु, राजनीतिक दलका नेता तथा कार्यकर्ताको उपस्तिथि रहेको थियो ।
