नेपालगञ्ज । दसैँको अवसरमा असोज २४ गतेबाट रिलिज भएको यस फिल्मले दुई सातामा १७ करोड २० लाख ग्रस कलेक्सन गरेको छ । प्रदर्शनको समयदेखि नै चलचित्र प्रेमीहरुको अपार माया पाईरहेको चलचित्र ‘छक्का पञ्जा ५’ १७ करोड बढीको कलेक्सन गर्न सफल भएको हो ।
आक्रामक व्यापार गरिरहेको फिल्म ‘छक्का पञ्जा ५’ आजबाट तेस्रो सातामा प्रवेश गरेको छ । दुई सातामा ‘छक्का पञ्जा ५’ १७ करोड २० लाख कमाइ गरेको यस फिल्मका वितरक मनोज राठीले जानकारी दिनुभयो ।
दीपाश्री निरौला निर्देशित फिल्ममा दीपकराज गिरी, वर्षा शिवाकोटी र केदार घिमिरे मुख्य भूमिकामा हुनुहुन्छ । फिल्ममा दीपकसहित केदार र निर्मल शर्माको लगानी छ । दीपककै कथा, पटकथा र संवाद रहेको फिल्मको कथा कर्मचारीतन्त्र र राजनीतिमा केन्द्रित छ ।
ब्यांकटेस इन्टरटेनमेन्टले यस फिल्मलाई नेपालभर वितरण गरिरहेको छ । पहिलो साता भने फिल्मले साढे ११ करोड कमाइ गरेको थियो ।
