नेपालगन्ज । अवैध औषधि पसल सञ्चालन गरी औषधि बिक्री वितरण गर्ने एक जनालाई नियन्त्रणमा लिइएको छ । बाँकेको डुडुवा गाउँपालिका वडा नम्बर – ६ स्थित चौधरीपुर्वामा अवैध औषधि पसल सञ्चालन गर्ने विकास लखेरलाई नियन्त्रणमा लिएको बाँके प्रशासनले जनाएको हो ।
बजार अनुगमनका बेला लखेरले सञ्चालन गरेको पसलमा ७५ प्रतिशत औषधि म्याद गुज्रेका र केही औषधि नेपालमा बिक्री वितरण गर्न रोक लगाइएको पाइएपछि उनलाई नियन्त्रणमा लिएर पसल शिल गरेको बाँकेका प्रमुख जिल्ला अधिकारी श्रवणकुमार पोख्रेलले जानकारी दिए ।
प्रमुख पोख्रेलका अनुसार ‘औषधि पसल दर्ता पनि छैन, औषधि पनि वैधानिक छैनन्,’ अवैध रुपमा औषधि बिक्री गरेको पाइएको र उनीसँग यस सम्बन्धी कुनै योग्यताको प्रमाणपत्र पनि नभएको पाएपछि हामीले उनलाई नियन्त्रणमा लिएका छौं, उनले भने ।
उनलाई औषधि व्यवस्था विभाग शाखा कार्यालय नेपालगन्जसँग समन्वय गरी नक्कली बिक्रेता लखेरलाई औषधि बिक्री वितरण सम्बन्धी प्रचलित कानुन बमोजिम कारबाही गरिने प्रमुख पोख्रेलले बताए ।
