रिजवान मिर्जा✍️
नेपालगन्ज । नेपाल कानून व्यवसायी परिषद्को लुम्बिनी प्रदेश पार्षदमा ईश्वरी प्रसाद ज्ञवाली निर्वाचित हुनुभएको छ । शनिबार सम्पन्न निर्वाचनमा १६५ मतान्तरका साथ ज्ञवाली प्रदेश पार्षदमा निर्वाचित हुनुभएको हो ।
ज्ञवालीले ४३८ मत प्राप्त गर्नुभयो भने उहाँका निकटम प्रतिद्वन्द्वी मदन कुमार पुनले २७३ मत प्राप्त गरेर पराजित हुनुभएको छ ।
नेपालगन्जस्थित जिल्ला अदालत बार एशाेसिएसनको भवनमा बिहान १० बजेदेखि दिउँसो ४ बजे सम्पन्न निर्वाचनमा नेपालगन्ज मतदान केन्द्रबाट ज्ञवालीले २१६ मत प्राप्त गर्नुभएको थियोे भने पुनले ७६ मत प्राप्त गरेका थिए । नेपालगन्जमा ३२० जना मतदाता रहेका थिए ।
त्यसैगरी पाल्पाबाट ज्ञवालीले १९ मत प्राप्त गर्नुभएको थियोे भने पुनले १४ मत प्राप्त गरेका थिए । यस्तै तुलसीपुरबाट ज्ञवालीले ८३ मत र पुनले ४२ मत प्राप्त गर्नुभएको थियोे । त्यस्तै बुटवलबाट ज्ञवालीले १२० मत र पुनले १४१ मत प्राप्त गर्नुभएको थियोे ।
नेपालगन्ज उच्च अदालत बार एशोसिएसनका अध्यक्ष चित्र बहादुर शाही र जिल्ला अदालत बार एशोसिएसनका अध्यक्ष महरसिंह खत्रीकाे अगुवाईमा सम्पन्न निर्वाचनमा मतदान गर्न बाँके, बर्दिया लगायत अन्य जिल्लाका वकिलहरुको उपस्थिति रहेको थियाे ।
