बंगलादेशको दक्षिण–पूर्वी शहर सीताकुन्डको एउटा कन्टेनर डिपोमा भएको आगलागीमा परी ज्यान गुमाउनेको संख्या ४० पुगेको छ । ज्यान गुमाउनेमा पाँच जना अग्नी नियन्त्रक पनि रहेको बीबीसीले जनाएको छ ।
सीताकुन्ड बंगलादेशको दोस्रो ठूलो शहर चटगाउँबाट ४० किलोमिटरको दूरीमा पर्छ । चटगाउँ मेडिकल कलेजका अनुसार अहिलेसम्म ३४ जनाको शव अस्पताल पर्याएको छ ।
आगलागीमा सयौँ जना घाइते भएका हुँदा ज्यान गुमाउनेको संख्या अझै बढ्न सक्ने अनुमान गरिएको छ । सीताकुन्डमा आगो लागेपछि आगो नियन्त्रणका लागि दमकल बोलाइएको थियो । त्यहीबेला विष्फोट पनि भएको बताइएको छ ।
आगलागीको कारण अहिलेसम्म थाहा हुन सकेको छैन । डिपोमा केही कन्टेनरमा केमिकल रहेको र त्यही कारण आगो फैलिएको हुनसक्न आँकलन गरिएको छ ।
घटनास्थल आसपासका अस्पतालहरु घाइतेहरुले भरिएका छन् । उपचारमा रगतको अभाव भएपछि रक्तदानका लागि सर्वसाधारणलाई अपील गरिएको छ ।
