नेपालगन्ज । नेपाल कम्युनिष्ट पार्टी (एमाले) बाँकेले जेन्जी आन्दोलनको नाममा आपराधिक गतिविधि घटनामा संलग्न व्यक्तिहरूलाई कारवाही गर्न सोमबार जिल्ला प्रशासन कार्यालय बाँकेमा ज्ञापनपत्र बुझाएको छ ।
गत भदौं २३ र २४ गते जेन्जी आन्दोलनको क्रममा बाँकेमा विभिन्न सरकारी कार्यालय तोडफोड, आगजनी र लुटपाटका घटनामा संलग्न व्यक्तिहरूलाई तत्काल पक्राउ गरि कडा कारबाही गर्न जोडदार माग गर्दै बाँकेका प्रजिअ दिल कुमार तामाङ्गलाई ज्ञापनपत्र बुझाएको हो ।
नेकपा (एमाले) बाँकेका अध्यक्ष निरक गुरूङ्गले जेन्जीका नाममा अराजक समूहले जिल्ला प्रशासन कार्यालय, मालपोत, नापी, अदालत, भन्सार, आन्तरिक राजस्व, नेपालगञ्ज उपमहानगरपालिका कार्यालय लगायत विभिन्न सरकारी तथा सार्वजनिक सम्पत्तिमा संगठित रूपमा तोडफोड र आगजनी गर्दै राज्य संयन्त्रलाई अस्थिर बनाउने उद्देश्यले घटना घटाएको ज्ञापनपत्रमा उल्लेख छ ।
यसैगरी पुष्पलाल, बीपी कोइराला, गणेशमान सिंह र हितु बिक्रम शाहीका सालिक तोडफोड गर्ने, सार्वजनिक सम्पत्तिमा क्षति पुर्याउने तथा प्रदेश र संघीय सरकारलाई दबाबमा पार्ने प्रयास भएको एमाले बाँकेले जनाएको छ । घटनाका मूलयोजनाकार र संलग्न सबै अपराधीहरुलाई कानूनी दायरामा लिएर कडा कारबाही गर्न एमाले बाँकेले आग्रह गरेको छ ।
“सार्वजनिक सम्पत्तिमाथि आक्रमण गर्नु कानून, शासन, सुरक्षा र राज्यको विश्वसनीयतामाथि गरेको धावा हो” ज्ञापनपत्रमा लेखिएको छ । राज्य संयन्त्रलाई घटनालाई सामान्य रूपमा नलिएर, अपराधीकृत क्रियाकलापमा संलग्न भएका व्यक्तिहरूलाई चाँडोभन्दा चाँडो पक्राउ गरी कारबाही अगाडि बढाउन एमाले बाँकेले जोडदार माग गरेको छ ।
