नेपालगन्ज । बाँकेको नेपालगञ्ज-१३ स्थित रामलीला मैदानमा ऐतिहासिक संस्कृतिको रूपमा रहेको रामलीला महोत्सव मञ्चन भइरहेको छ । भारतको वृन्दावन धामको ब्रज रासलीला एवं रामलीलाका २५ जना कलाकारहरुले प्रदर्शन गरिरहेका छन् ।
नेपालगञ्जवासी र सो वरिपरिका क्षेत्रबाट प्रत्येक दिन चासो र उत्साहका साथ रामलीला महोत्सवमा सयौँको सङ्ख्यामा नेपाल र भारतका समेत मध्यरातसम्म सहभागी हुने गर्दछन् । प्रत्येक वर्ष दशैंका अवसर पारेर नेपालगन्जमा रामलीला महोत्सव मञ्चन हुँदै आएको छ । वि.सं.१९२५ सालदेखि नेपालगञ्जको कुरैश नगर मैदान, टण्डन राइस मिल हुँदै र अहिले रामलीला मैदानमा रामलीला मञ्चन भइरहेको छ ।
सत्यमाथि विजयको प्रतीकका रूपमा मनाइने दशैको पहिलो दिन घटस्थापनादेखि मध्यरातसम्म रामलीला मञ्चन गर्ने गरिन्छ । लीलामा राम र सीताको जीवनीमा आधारित विभिन्न कथालाई नाटकीय रूपमा प्रस्तुत गर्ने गरिन्छ । लीलामा धनुषयज्ञ, रावण वध, भरतमिलाप र रामको शुभ राज्याभिषेक जस्ता दृश्यको मञ्चन गरिन्छ ।
