नेपालगन्ज / नेपालगञ्जस्थित राँझा विमानस्थलबाट मोबाइल सेटसहित भारतीय नागरिकलाई बाँके प्रहरीले पक्राउ गरिएको छ । बुद्ध एयरलाईन्सको जहाजबाट अवैधरुपमा काठमाण्डौं लैजान लागिएको ३२ थान मोबाइल सेटसहित ४ जना भारतीय नागरिकलाई पक्राउ गरिएको हो ।
विमानस्थलमा रहेको एक्सरे मेसिनमार्फत चेकजाँचको क्रममा करिब ९ लाख रुपैया मूल्य बराबरको मोबाइल सेटसहित ४ जना भारतीय नागरिकलाई पक्राउ गरिएको जिल्ला प्रहरी कार्यालय बाँकेका प्रहरी प्रवक्ता (डिएसपी) नारायण डाँगीले जानकारी दिए ।
भारतको मध्यप्रदेश राज्य साई बाबा नगर इन्दौर सुदामा नगर बस्ने ३८ बर्षीय अमित सोलंकीको साथबाट ८ थान, मध्य प्रदेश पागनीसपागा ईन्दौर बस्ने ३७ बर्षीय सचिन कुकरेजको साथबाट ८ थान, मध्य प्रदेश ईन्दौर द्वारकापुरी आईडियल स्कुल नजिक बस्ने ३९ बर्षीय कमल बंसारीको साथबाट ८ थान र मध्य प्रदेश ब्लक काँलोगी बस्ने ३६ बर्षीय अमित सोलंकीको साथबाट ८ थान गरी जम्मा ३२ थान मोबाइल बरामद गरिएको छ । उनीहरुको साथबाट बरामद गरिएको मोबाइल वन प्लस, ओप्पो, रियलमी, रेडमी, सामसुङ कम्पनीको रहेकोे छ । मोबाइल खोलभित्र नरहेको र खुल्ला रुपमा रहेको डिएसपी डाँगीले बताए ।
यसअघि भदौ २५ गते पनि नेपालगञ्ज विमानस्थलबाट काठमाडौं जाँदै गरेको अवस्थामा एक्सरे मेसिनमार्फत चेकजाँचको क्रममा एकजना सरकारी कर्मचारीलाई स्रोत नखुलेको २६ लाख रुपियाँसहित प्रहरीले पक्राउ गरेको थियो । मोबाइल सेटसहित पक्राउ परेकालाई आवश्यक कारबाहीका लागि नेपालगञ्ज भन्सार कार्यालय पठाइएको प्रहरीले जनाएको छ ।
