काठमाडौँ / त्रिभुवन विमानस्थलको सम्पूर्ण उडान ६ घण्टाका लागि अवरुद्ध हुने भएको छ । आगामी वैशाख ७ गते विमानस्थलको आन्तरिक तथा बाह्य सम्पूर्ण उडान ६ घण्टाका लागि अवरुद्ध हुने भएको हो ।
त्रिभुवन अन्तर्राष्ट्रिय विमानस्थल (टीआईए) का अनुसार विमानस्थलमा यात्रुहरुको सुरक्षामा थप अभिवृद्धि गर्ने उद्देश्यले विद्युत् आपूर्ति प्रणालीलाई थप सुदृढीकरण गर्ने सिलसिलामा अनलाइन यूपीएस जडान गर्नु परेकाले सो दिन बिहान १ देखि बिहान ७ बजेसम्म उडान अवरुद्ध हुनेछ ।
विमानस्थलमा विद्युत् आपूर्ति अवरुद्ध हुँदा कुनैपनि आन्तरिक / अन्तर्राष्ट्रिय वायुयान उडान / अवतरण नहुने टीआईएले जनाएको छ । यसबाट प्रभावित हुने यात्रुहरुलाई सम्बन्धित वायुसेवा कम्पनीहरूसँग सम्पर्कमा जान यात्रुहरुलाई अनुरोध समेत गरेको छ ।
