भैरहवा / रुपन्देहीको रोहिणी खोलामा बस पल्टिंदा आठ जनाको पहिचान भएको छ । जसमा एकै परिवारका पाँच जना सवार बसमा बाबु – छोराको मृत्यु भएको छ, भने अन्य तीन जना घाइते भएका छन । दुर्घटनामा ५० वर्षीया बुवा नागेन्द्र शर्मा र छोरा ४० वर्षीया अरविन्द्र शर्माको मृत्यु भएको हो ।
दुर्घटनामा अरविन्द्रको श्रीमती सीता, छोरी : ५ वर्षीया संदीपा र छोरा : ४ वर्षीय यश शर्माको उपचार भइरहेको छ । सीताको इमरजेन्सी कक्षको स्पेशल केयर युनिटमा उपचार भइरहेको छ, भने संदीपा र यशको इमरजेन्सीको सामान्य कक्षमा उपचार भइरहेको अस्पताल प्रशासनले जनाएको छ । उनीहरू पाँचै जना जनकपुरमा रहेको घरमा विवाहका लागि गएका थिए ।
यसैगरी दुर्घटनामा मृत्यु भएका अन्य ६ जनाको पहिचान हुनेमा रुपन्देहीको ओमसतिया गाउँपालिका – ४ का ६५ वर्षीय राजेन्द्र पाण्डे, तिलोत्तमा नगरपालिका – ८ की ३७ वर्षीया तुलसी बस्याल, तिलोत्तमा – २ योगीकुटीका ५६ वर्षीय विष्णु पौडेल, रौतहट चन्द्र निगहपुरका – २० वर्षीय दिनेश दास, बुटवल उपमहानगरपालिका – ११ कालिकानगरका ४८ वर्षीय कृष्णप्रसाद बस्याल र सितामणि भारतका ४५ वर्षीय सञ्जय गुप्ता रहेका छन् ।
दुर्घटनामा दुई जना बालक, ६ जना महिलासहित ३२ जना सवार बस दुर्घटनामा ९ जनाको मृत्यु भएको रुपन्देही ट्राफिक प्रहरी प्रमुख केशव केसीले जानकारी दिए । यो समाचार तयार पार्दा सम्म दुर्घटनामा मृत्यु भएका अन्दाजी ३०/३५ वर्षको एक जना पुरुषको भने सनाखत हुन सकेको छैन । 
जनकपुरबाट भैरहवा आउँदै गरेको लु २ ख ३८४१ नम्बरको रात्रीकालिन यात्रुवाहक बस भैरहवा–परासी सडक खण्ड अन्तर्गत रोहिणी पुलबाट आइतबार बिहान करिब साढे ४ बजेतिर पुलबाट तल खोलामा खसेको थियो ।
