नेपालगञ्ज । नेपाल टेलिकमको नेपालगञ्जस्थित उप प्रादेशिक निर्देशनालय परिसरमा थन्काइएको ठुलो मात्राको टेलिफोन कपर तार चोरी भएको छ । नेपालगञ्ज – १० स्थित निर्देशनालय पछाडी राखिएको डिस मेन्टल (लिलाममा लैजान पर्ने) तार गएराती चोरी गरिरहेकै अवस्था देखिएपछि योजनावद्ध ठुलो चोरीको घटना सार्वजनिक भएको हो ।
गएरातीको घटनापछि बुधबार निर्देशनालयको टोली उत्तर तर्फको निजी बन (झाडी) मा पुगेपछि लुकेर महिनौदेखि तार (तामा) संकलन गरेर लगिएको पत्ता लागेको हो । कहिलेदेखि कति मात्रामा तार चोरिएको एकिन नभएपनि १० क्विन्टल बराबरको तार चोरिएको निर्देशालयको अनुमान छ ।
निर्देशनालयका सूचना अधिकारी मुक्ती ज्ञवालीका अनुसार महिनौदेखि तयारीका साथ नियमित जसो झाडीमा बसेर तारहरु चोरिएको पाइयो । अहिले नेपालमा तामा कम्तीमा एक केजीको एक हजार पर्दछ । झाडीमा तारहरु यत्र तत्र छरिएको, लत्ताकपडा, पानीको बोतल फालिएको अवस्था छ ।
केही दिनअघि केवल(ठुलो) तार चोरिरहेको कार्यालयको सीसीटीभी क्यामेरामा देखिएपछि चनाखो बनेको निर्देशनालयले गएराती सुरक्षागार्डसहित चोर छोप्ने प्रयास गरेको हो । तर प्रहरीले वुद्धीमता नदेखाएसी चोर भाग्न सफल भएका हुन् ।
चोर आएपछि गार्डले सवा १२ बजे नै जिल्ला प्रहरी कार्यालय बाँकेको १०० नम्बरमा कल गरेर सहयोग मागेपछि त्यहाँबाट वडा प्रहरी कार्यालयबाट नगर भवन अस्थायी प्रहरी पोस्टलाई खबर गरियो । सुरक्षा गार्डका अनुसार दुई जना प्रहरी मात्रै आए तर चोर पक्रिन जाँदा लाईट बालेर जाने प्रयास भएपछि चोरहरु देवाल कुदेर भाग्न सफल भए ।
प्रहरीको सहयोग लिन खोज्दा पनि प्रहरी सचेत र जिम्मेवार नभईदिएपछि चोरहरु फरार मात्र भएनन् घटना नै थप रहस्मय रहयो ।काम नलाग्ने तार चोरी भएकाले यो घटना बाहिर नल्याउँदा पनि हुने निर्देशनालयका उप निर्देशक निरज राजवंशीको भनाई थियो ।
तर यो घटना सुरक्षा व्यवस्थामाथिको ठुलो चुनौती पनि हो । उप निर्देशक राजवंशी सहितको टोलीले आजै प्रमुख जिल्ला अधिकारी धर्मराज जोशी र प्रहरी उपरिक्षक राम प्रसाद घर्तीमगरलाई भेटेर घटनाको जानकारी गराउँदै ध्यानाकर्षण गराएको छ ।
