नेपालगन्ज / काठमाडौंबाट पोखरा जाँदै गरेको यात्रु बस धादिङको गजुरी गाउँपालिका – २ चालिसेस्थित छहराबाट त्रिशुली नदीमा खस्दा ८ जनाको मृत्यु भएको छ । भने आठ जना घाइते भएका छन । आज बिहान करीब सवा ११ बजेतिर प्रदेश ३–०१–००५ ख ९९५२ नम्बरको यात्रु बस अनियन्त्रित भइ सडकबाट करिब ४० मिटर तल त्रिशुली नदीमा खसेको थियो ।
दुर्घटनामा २ महिला र ६ पुरुष गरी ८ जनाको मृत्यु भएको जिल्ला प्रहरी कार्यालय धादिङका प्रवक्ता एवं (डिएसपी) सन्तु जयसवालले जानकारी दिए । घटनास्थलबाट १६ जनाको उद्धार गरिएको थियो, तिनीहरुमध्ये ८ जनाको डेथ भएको छ र ८ जना घाइते रहेकोे डिएसपी जयसवालले बताए ।
घाइतेको स्थानीय अस्पतालमा उपचार भइरहेको छ । घटनास्थलमा नेपाली सेना, सशस्त्र प्रहरी र नेपाल प्रहरीको टोली उद्धारमा खटिएका छन । उद्धार कार्य जारी छ । बसमा कति यात्रु सवार थिए भन्ने खुलेको छैन ।
