नेपालगन्ज / बाँकेमा हुन लागेको ७ औं राष्ट्रिय थारु साहित्य सम्मेलनको तयारी तीब्र पारिएको छ । यही माघ २० गतेदेखि जिल्लाको राप्ती सोनारी गाउँपालिक वडा नम्बर ६ स्थित सिधनवामा हुन लागेको सम्मेलनको तयारी तीब्र पारिएको हो ।
थारु लेखक संघ नेपाल बाँके र थारु गोचाली समाज नेपाल राप्ती सोनारीले शनिबार नेपालगन्जमा पत्रकार सम्मेलन गरि यस्तो जानकारी दिएका हुन । पत्रकार सम्मेलनमा संघका केन्द्रिय सदस्य शेखर दहितले यही माघ २० गतेदेखि २२ गतेसम्म हुन लागेको सम्मेलनमा थारु भाषा, साहित्य, कला, सँस्कृती, परम्परा लगायत विषयमा छलफल र बहस हुने जानकारी दिए ।
‘सम्मेलनमा आएका पाहुनालाई राप्ती सोनारी र नरैनापुर गाउँपालिकामा रहेका पर्यटकीय क्षेत्र बर्फानीबाबा आश्रम, सन्तानेश्वर मन्दिर, भुवर भवानी मन्दिर लगायत क्षेत्रको अवलोकन गराउने कार्यक्रम रहेको छ,’ थारु गोचाली समाजका महासचिव कालुराम समर्पणले भने ।
२०७३ सालमा पहिलो राष्ट्रिय थारु साहित्य सम्मेलन दाङमा भएको थियो । दोस्रो सम्मेलन कैलालीको धनगढी, तेस्रो बर्दियाको बढैयातालमा, चौथो रुपन्देहीको मुर्गिया, पाँचौं सुर्खेतको नयाँ गाउँ, छैठौं सम्मेलन कञ्चनपुरमा आयोजना गरिएको थियो ।
