काठमाडौं । राष्ट्रपति कार्यालयको खण्डहर भवन बाहिर पाल टाँगेर नवनियुक्त तीन मन्त्रीले आज शपथ लिएका छन् ।
प्रधानमन्त्री सुशीला कार्कीको उपस्थितीमा राष्ट्रपति रामचन्द्र पौडेलबाट सोमबार अर्थमन्त्रीमा रामेश्वर खनाल, ऊर्जा जलस्रोत तथा सिँचाई भौतिक पूर्वाधार तथा यातायात तथा सहरी विकास मन्त्रीमा कुलमान घिसिङ र गृह तथा कानुन न्याय तथा संसदीय मालिला मन्त्रीमा ओमप्रकाश अर्यालले शपथ लिएका हुन् ।
जेनजी आन्दोलनका क्रममा आगजनी भएपछि शीतल निवास पनि बस्न नमिल्ने अवस्थामा पुगेको थियो । त्यसैले गत शुक्रबार प्रधानमन्त्री सुशीला कार्कीको शपथ राष्ट्रपति निवासभित्रै भएको थियो ।
घिसिङलाई तीन, अर्याललाई दुई र खनाललाई एक मन्त्रालयको जिम्मेवारी दिइएको छ । शपथ कार्यक्रममा सरकारी निकाय र कूटनीतिक नियोगका प्रमुखहरू पनि सहभागी भएका छन ।
