आज देशभर जनै पूर्णिमा अर्थात रक्षा बन्धन पर्व मनाइँदै

नेपालगन्ज । आज देशभर जनै पूर्णिमा अर्थात रक्षा बन्धन पर्व मनाइँदैछ । जनै पूर्णिमाका अवसरमा देब्रे काँधबाट शरीरमा ‘जनै’ (पवित्र धागो) बाँध्ने रङ्गधारीहरूले आज कपाल काटेर नुहाएर पवित्र धागो परिवर्तन गर्छन, भने तराई क्षेत्रमा दिदीबहिनीले दाजुभाइको नाडीमा दिर्घायु र समृद्धिको कामना गर्दै आकर्षक ‘राखी’ बाँधिने चलन छ ।

समयसापेक्ष परम्परा अनुसार हिन्दु धर्मावलम्बीहरुले नाडीमा ताबीजको रूपमा बाँधिएको ‘रक्षा बन्धन’ धागो ग्रहण गर्छन् । डर र रोगबाट रक्षाको प्रतीकका रूपमा ब्राह्मण पुजारीहरूले मन्त्रजप गरेर पहेँलो धागोलाई शुद्ध गर्ने गरेको धर्मगुरुहरु बताउँछन् । यस पर्वलाई नेवार समुदायले ‘क्वान्ती पूर्णिमा’ भनेर पनि मनाउने गर्दछन् ।

आज नेपालगन्जस्थित बागेश्वरी मन्दिर, काठमाडौंको पशुपतिनाथ र ललितपुरको कुम्भेश्वर लगायत देशका विभिन्न शिव मन्दिरमा हजारौं भक्तजनले शिवको पूजा–आराधना गरी पोखरी, ताल र नदीमा पवित्र स्नान गर्ने छन् । यो पर्व मूलतः देशमा बहुसंख्यक हिन्दूहरूले मनाउने गर्छन ।